Arsim më i mirë për një të ardhme më të ndritur - Misioni i OSBE-së në Shkup dhe Ministria e Arsimit japin grante për shkollat dhe shoqatat civile
SHKUP, 8 qershor 2023 — Misioni i OSBE-së në Shkup, së bashku me Ministrinë e Arsimit dhe Shkencës, ndanë grante për 14 shkolla anembanë Maqedonisë së Veriut që do të mbështesin zbatimin e orëve të përbashkëta kurrikulare - klasa në të cilat dy mësues mbajnë orë të përbashkëta në dy gjuhë, si mjet për të nxitur shkëmbimin ndërmjet bashkësive të ndryshme etnike.
“Kjo shënon fillimin e një ndërmarrjeje të re të përbashkët që do të zgjasë disa vite, duke sjellë ndryshime të rëndësishme dhe pozitive në institucionet publike arsimore dhe komunat në mbarë vendin”, tha shefi i Misionit të OSBE-së në Shkup, ambasadori Kilian Wahl.
Përgjigja e madhe ndaj thirrjes për aplikime ka treguar ambicien e përhapur që shkollat të bëjnë më shumë për të nxitur integrimin dhe mirëkuptimin etnik duke u bashkuar me shkolla të tjera njëgjuhëshe për të ofruar këto klasa të integruara. Në Kumanovë, për shembull, shkolla fillore “Faik Konica” Sllupçanë, është në partneritet me shkollën fillore “Magdalena Antonova” që ndodhet 13 kilometra larg. Partneriteti i tre shkollave fillore në Gazi Babë “25 Maji”, “Bane Krapçev” dhe “Naum Naumovski Borçe” është një shembull tjetër i vullnetit për të punuar së bashku pavarësisht distancës fizike.
Duke theksuar frymën e bashkëpunimit dhe partneritetit në realizimin e këtij projekti, ministri i Arsimit dhe Shkencës Jeton Shaqiri tha: “Falenderojmë Misionin e OSBE-së në Shkup, i cili nën menaxhimin e ambasadorit Wahl ka marrë një impuls të ri, veçanërisht në aspektin e ndërtimit të një mjedis paqësor, të sigurt dhe harmonik në shkolla.”
Misioni gjithashtu ofron pesë grante për organizatat e shoqërisë civile (OSHC) që punojnë për të bashkuar fëmijët dhe të rinjtë me prejardhje të ndryshme etnike. Një grant i tillë po i jepet OShC-së Sumnal, e cila do t'i përdorë fondet për të punuar me shkollat në Manastir për të kapërcyer diskriminimin ndaj komunitetit rom përmes një sërë punëtorish artistike.
“Jam i impresionuar nga portofoli i propozuar i aktiviteteve. Unë shoh vullnet, kreativitet dhe përkushtim konkret për avancimin e marrëdhënieve mes gjeneratave të reja,”deklaroi ministri Shaqiri
Grantet janë pjesë e një vizioni afatgjatë për të përkrahur unitetin dhe integrimin në mbarë vendin.
Projekti “Ndërtojmë Ura të Reja” do të lëshojë thirrje tjera për aplikime për grante në vjeshtë të këtij viti.
“Ne besojmë se mund të kemi një ndikim pozitiv në jetën e të rinjve me prejardhje të ndryshme dhe të ndihmojmë në krijimin e një të ardhmeje më gjithëpërfshirëse dhe të begatë për të gjithë në Maqedoninë e Veriut,” përfundoi ambasadori Wahl.