Стрип-натпревар: Дајте ѝ шанса на инклузијата!

Преку 250 млади стрип-уметници се натпреваруваа за место во каталогот и изложбата на Стрип-центарот која ќе се одржи ова лето, со цел да се создадат стрипови кои промовираат меѓуетничко разбирање во Северна Македонија. Преку партнерства со локални граѓански организации, како што е Стрип-центарот, Мисијата на ОБСЕ во Скопје ги унапредува иницијативите поттикнати од заедницата за да се изгради поинклузивно општество.

Младинскиот меѓукултурен уметнички фонд (ММУФ) на Мисијата, компонента на проектот „Градиме нови мостови“, ги оснажува младите луѓе од различно етничко потекло да се борат против дискриминацијата преку уметничко изразување. Третиот повик за грант од ММУФ за граѓански организации се затвора наскоро, а Мисијата со нетрпение ја очекува блиската работа со избраните организации.

Еден истакнат добитник на грант од ММУФ е Стрип-центарот од Велес со проектот „Сѐ што велиме е Дајте ѝ шанса на инклузијата!“. Во текот на четиридневната едукативна работилница која се одржа во април во село Нежилово, дванаесет талентирани младинци од различно етничко и географско потекло ги усовршија своите вештини под водство на искусни ментори.

На работилницата за стрип се разгледаа темите за пријателство кои ги надминуваат културните граници. Избраните творби од работилницата ќе бидат објавени во стрип-каталог, а се планираат и пет изложби ширум земјата со цел да се покажат талентите на младите уметници.

Основан во 2011 од страна на страстни стрип-уметници од Велес, Стрип-центарот игра значајна улога во промовирањето стрипови од Северна Македонија во земјата и во странство. Нивниот избор за грант од ММУФ ја истакнува нивната заложба за користење на уметноста како алатка за општествена промена.

Други граѓански организации кои учествуваат во иницијативата на „Градиме нови мостови“ работат на театарски продукции, поткасти, мурали, филмови, народни ора и музички групи. Секој проект придонесува кон целта на Мисијата за негување дијалог и социјална кохезија помеѓу различните заедници во Северна Македонија.