Ҳайати намояндагони Тоҷикистон дар сафари ташкилнамудаи САҲА таҷрибаи пешқадами муҳитзистии Гурҷистонро меомӯзад
Дафтари барномаҳои САҲА дар Душанбе сафари ҳайати намояндагони Тоҷикистонро ба Гурҷистон 9-16 майи соли 2022 дастгирӣ кард. Дар ҷараёни боздиди омӯзишӣ ҳайати намояндагон бо таҷрибаи Гурҷистон дар пешбурди маърифати экологӣ дар заминаи Ҳадафҳои Рушди Устувор, татбиқи стратегияҳои тиҷорати аз ҷиҳати экологӣ тоза ва мусоидат ба рушди принсипҳои иқтисоди сабз шинос шуд.
Ба ҳайати мазкур 12 нафар намояндагони парлумон, Дастгоҳи иҷроияи президент, Кумитаи ҳифзи муҳити зист, Вазорати рушди иқтисод ва савдо, Вазорати маориф ва илм, инчунин намояндагони ҷомеаи шаҳрвандӣ шомил буданд. Намояндагони Гурҷистон дар бораи нақши ҷавонон ва созмонҳои ғайридавлатии Гурҷистон дар мубориза бо мушкилоти экологӣ, манъи халтаҳои пластикӣ дар сатҳи миллӣ ва таҷрибаи истифодаи халтаҳои ба таври биологӣ (табиатан) нобудшаванда, нобудсозӣ ва коркарди партовҳо ва сиёсати дарозмуддати миллӣ оид ба амнияти экологӣ маълумот гирифтанд.
Ҷаноби Муҳаммадраҳим Юсуфӣ, раиси Комиссияи экологии Маҷлиси намояндагони Маҷлиси Олии Ҷумҳурии Тоҷикистон ба САҲА барои ташкили сафари табодулӣ арзи сипос намуда, аз ҳамкориҳои минбаъда бо ҳамтоёни гурҷӣ дар самти татбиқи лоиҳаҳои мутақобилан судманди ташаббусҳои пешбурди сиёсати сабз изҳори умедворӣ кард.
Хонум Майя Битадзе, раиси Кумитаи парлумони Гурҷистон ҳайати намояндагони Тоҷикистонро дар Гурҷистон истиқбол гирифта, дар бораи масоили экологӣ дар Гурҷистон, аз ҷумла, дар бораи амалӣ шудани ҳуқуқи экологӣ изҳори назар кард. Илова бар ин, хонум Битадзе бо нақшаи иборат аз ҳашт банди Кумитаи ҳифзи муҳити зист ва захираҳои табиии парлумони Гурҷистон бо афзалиятҳои рушди даврии иқтисодӣ, масъалаҳои муҳитзистии шаҳрҳо, инчунин мубориза бо ифлосшавии ҳаво, об ва хок ва мусоидат ба соҳибкорӣ дар масъалаҳои такмил додани даври истехсолот шинос намуд.
Ҳамкорони тоҷику гурҷӣ барои табодули таҷриба ва андешаҳо дар ҳалли масъалаҳои муҳитзисти як платформаи муштарак таъсис доданд. Ҳайати намояндагон ба ширкати гурҷие, ки дар шаҳри Горӣ бастаҳои ба таври биологӣ вайроншаванда истеҳсол мекунад, ташриф оварда бо технология шинос шуд.