Расонидани кӯмак ба ҷавонон дар рушдӣ қобилиятҳои онҳо - қисми муҳими фаъолияти САҲА дар Тоҷикистон

Ҷавонон тахминан 70% аҳолии қариб нӯҳмиллионаи Тоҷикистонро ташкил медиҳанд, ки аксарияти онҳо дар деҳот истиқомат мекунанд. Бо вуҷуди гурӯҳи назарраси демографиро ташкил намудан, ҷавонон бештар эҳсос менамоянд, ки барои  иштироки фаъол дар ҳаёти ҷомеа имконияти кофӣ надоранд. Қисми муҳими фаъолияти Дафтари барномаҳои САҲА дар Душанбе ба кӯмак расонидан ба ҷавонони саросари кишвар ҷиҳати истифодаи пурраи қобилиятҳои худ бахшида шудааст.

Ташаббусҳои Дафтари барномаҳои САҲА, ки дар онҳо ҷавонон иштирок доранд «Шабакаи қабули қарорҳо бо роҳи ризоият», ҷомеае ки қариб 500 нафар ҷавонон аз Тоҷикистон ва дигар кишварҳои Осиёи Марказиро муттаҳид менамояд, «Қолаби САҲА» ва «Музокироти ҷавонони Осиёи Марказӣ»-ро дар бар мегирад.

Чорабиниҳо дар доираи ташаббусҳои мазкур ба ҷавонмардон ва ҷавонзанон дар такмили малакаҳои суханронии оммавӣ, мулоҳизаронӣ, тафаккури танқидӣ, малакаҳои таҳқиқӣ, таҳлилӣ ва музокиротии худ мусоидат мекунанд. Иштирокчиён муколама доир менамоянд, аҳамияти ҳамкории байналмилалӣ, муносибатҳои дипломатӣ ва фаъолияти созмонҳои минтақавӣ ва байналмилалиро меомӯзанд ва мавриди муҳокима қарор медиҳанд.

Сафари қаблии омӯзишӣ ба Котиботи САҲА дар Вена, Австрия аз 27 ноябр то 1 декабри соли 2018 суратгирифта ба шаш нафар узви «Шабакаи қабули қарорҳо бо роҳи ризоият», аз ҷумла ба ҷавонони дар чорабиниҳои доирнамудаи САҲА фаъолона ширкатварзида имконияти омӯзиши бевоситаи фаъолияти созмони байналмилалиро фароҳам овард.  Онҳо дар амал татбиқшавии принсипҳои САҲА, муносибати фарогири он ба амният ва муколама дар сатҳи боло дар соҳаи амниятро омӯхтанд.

Сафари омӯзишӣ аз ҷониби Дафтари барномаҳои САҲА дар Душанбе дар доираи кӯшишҳои он ҷиҳати дастгирии равандҳои демократии сиёсӣ дар Тоҷикистон доир гардида буд.

Дафтари барномаҳои САҲА дар Душанбе аз соли 2016 дар саросари кишвар чорабиниҳои «Қолаби САҲА»-ро доир менамояд. Онҳо ба баланд бардоштани сатҳи огоҳии ҷавонон дар бораи Созмон ва таъмини онҳо бо малакаҳои муҳими иштироки муштарак нигаронида шудаанд, Хуҷанд, 24 июли соли 2018.

«Шабакаи қабули қарорҳо бо роҳи ризоият» - ҷомеаи ҷавонони тамоми Осиёи Марказӣ аст, ки соли 2017 аз ҷониби иштирокчиёни чорабиниҳо барои ҷавонон бо дастгирии САҲА дар Тоҷикистон созмон дода шудааст. Ин шабака тахминан 500 иштирокчиёнро бо таҳкурсии рушди шахсӣ ва касбӣ таъмин мекунад, Ромит, Тоҷикистон, 14 майи соли 2018.

«Музокироти ҷавонон» - таҳкурсиест, ки ба насли навраси роҳбарон имконияти муаррифӣ намудани дастовардҳои худ, мубодилаи таърихи муваффақият ва муҳокима намудани масъалаҳои муҳими марбути рушди ҷавонон ва ҷомеа фароҳам меоварад, Ромит, Тоҷикистон, 28 августи соли 2018.

Дар кор бо ҷавонон Дафтар усули «ҳамсол ба ҳамсол»-ро истифода менамояд, ки ба ҷавонон имконияти омӯзиш аз ҳамдигар тавассути машғулиятҳо ва машқҳои интерактивӣ фароҳам меоварад, Душанбе, 10 майи соли 2018.

Иштирокчиён аз Қазоқистону Қирғизистон ҳангоми машғулияти амалии доир намудани музокирот, Ромит, Тоҷикистон, 12 майи соли 2018.

Моҳи майи соли 2018 аъзои «Шабакаи қабули қарорҳо бо роҳи ризоият» бо Дабири кулли САҲА Томас Гремингер ҳангоми сафари расмии ӯ ба Тоҷикистон мулоқот доир намуданд. Зимни мулоқот Дабири кулл масоили иштироки ҷавонон ва мавқеи фаъоли шаҳрвандиро мавриди муҳоқима қарор дод, Душанбе, 4 майи соли 2018.

Аз 27 ноябр то 1 декабри соли 2018 Дафтари барномаҳои САҲА дар Душанбе сафари омӯзиширо ба Котиботи САҲА дар Вена ташкил намуд. Барномаи сафар мулоқоту мусоҳибаҳоро бо мансабдорон ва коршиносони САҲА дар бар гирифт. Ҷавонон дар ҷаласаи Шӯрои доимии САҲА дар толори конфронси Ҳофбург ширкат варзиданд ва бо намояндаи Ҳайати намояндагии Ҷумҳурии Тоҷикистон дар САҲА мулоқот доир намуданд, Вена, 29 ноябри соли 2018.

Иштирокчиён ба Маркази байналмилалии Вена, маҷмаае, ки дар он муассисаҳои Созмони Милали Муттаҳиди маскуни Вена ҷойгиранд, ташриф оварданд. Ҷавонон бо фаъолияти созмонҳо ва муассисаҳои гуногуни Созмони Милали Муттаҳид шинос карда шуданд, Вена, 27 ноябри соли 2018.

Дар рафти сафари худ ба Котиботи САҲА ҷавонон бо Дабири кулли САҲА Томас Гремингер (дар марказ) ва Намояндаи махсуси Раиси амалкунандаи САҲА оид ба масоили ҷавонон ва амният Анна-Катарина Дейнингер (дуюм аз чап) мусоҳиба доир намуданд, Вена, 30 ноябри 2018.

Зимни мулоқот бо Дабири кулл Томас Гремингер (дар марказ) иштирокчиён барномаи марбути ҷавонони САҲА, аз ҷумла мушкилот ва дастовардҳои ҷавононро дар минтақа мавриди муҳокима қарор доданд. Онҳо инчунин дар бораи дастовардҳои худ ҷиҳати мусоидат ба рушди ҷавонон дар ноҳияҳои худ нақл карданд. Дабири кулл Гремингер қайд намуд, ки дохил намудани масоили ҷавонон ҳангоми таҳиянамоии усули фароандозавии амниятӣ ва муколамаи САҲА барои истиқрор ва тақвияти сулҳ бениҳоят муҳим аст. Иштирокчиёни сафари омӯзишӣ ҳамчунин ба Дабири кулл ҳадяи бо дасти худ офаридаи ҷомеаи «Шабакаи қабули қарорҳо бо роҳи ризоият»-ро тақдим намуданд, Вена, 30 ноябри соли 2018.