Prezenca e OSBE-së në Shqipëri forcon qeverisjen mjedisore në nivel bashkie
Prezenca e OSBE-së në Shqipëri përmbylli një seri trajnimesh tematike për forcimin e inspektimit dhe kontrollit mjedisor në nivel bashkie. Nisma ishte pjesë e përpjekjeve të vijueshme për të përmirësuar qeverisjen dhe sigurinë mjedisore në të gjithë vendin.
Trajnimet u zhvilluan në Tiranë (4 mars), Elbasan (11 mars), Lezhë (18 mars) dhe Gjirokastër (25 mars). Rreth 120 përfaqësues nga bashkitë ndërvepruan me institucione kyçe kombëtare, si Agjencia Kombëtare e Mjedisit, Agjenci Kombëtare e Pyjeve, Agjencia për Mbështetjen e Vetëqeverisjes Vendore, Inspektorati Qendror dhe Inspektorati Kombëtar i Mbrojtjes së Territorit.
Diskutimet u fokusuan në kuadrin ligjor, procedurat e inspektimit, bashkërendimin ndërinstitucional dhe praktikat më të mira në monitorimin mjedisor, inspektimin e pyjeve dhe kontrollin e ndotjes. "Këto trajnime theksojnë angazhimin e Prezencës së OSBE-së për të forcuar kapacitetet e bashkive dhe për të nxitur bashkëpunimin mes institucioneve qendrore e vendore për mbrojtjen e burimeve natyrore të Shqipërisë", tha Elton Qëndro, menaxher i projektit.
Seria e trajnimeve u realizua në kuadër të projektit të Prezencës së OSBE-së "Forcimi i qeverisjes dhe i sigurisë mjedisore në Shqipëri", i cili financohet nga Norvegjia, Franca dhe Italia. Ky projekt u ofron autoriteteve kombëtare dhe vendore njohuritë dhe mjetet e nevojshme për të përmirësuar mbrojtjen e mjedisit dhe zbatimin e ligjit.