Raporti i Misionit të OSBE-së në Kosovë për kërkesat pronësore që lidhen me konfliktin
Një zgjidhje e shpejtë e kërkesave pronësore që lidhen me konfliktin, përfshirë edhe ato rreth kthimit të pronës, duhet të mbesin vendosmërisht në agjendën e institucioneve në Kosovë dhe komunitetit ndërkombëtar pasi që është themelore për procesin e kthimit, zhvillimin ekonomik dhe marrëdhëniet mes komuniteteve, nxjerrë në përfundim raporti i paraqitur nga Misioni i OSBE-së në Kosovë më 29 qershor.
“Gati njëmbëdhjetë vite që nga përfundimi i konfliktit janë zgjidhur rreth 29,000 lëndë që lidhen me lëndët për pronën banesore. Për fat të keq, ka ende për të bërë. Ky problem dëmton me mijëra njerëz, kryesisht persona të zhvendosur”, tha gjatë paraqitjes së raportit Edward P. Joseph, Zëvendës Shef i Misionit të OSBE-së në Kosovë.
“Agjencia Kosovare e Pronës (APK) – e cila është agjencia kryesore vendore me mandat për zgjidhjen e kërkesave pronësore që lidhen me periudhën e konfliktit, ende ka mjaft ngarkesa me më shumë se 40,000 lëndë”, theksoi ai.
Raporti me titull “Sfidat në Zgjidhjen e Kërkesave Pronësore që Lidhen me Konfliktin në Kosovë” ka vlerësuar funksionimin e mekanizmave grupor të themeluar në Kosovë dhe ka analizuar lëndët e vështira me të cilat përballet AKP.
Raporti identifikon sfidat kryesore deri në zgjidhjen në kohë të kërkesave pronësore, siç janë ankesat e shumta rreth të së njëjtës pronë, koordinimin e pamjaftueshëm dhe kontestet rreth kompetencave ndërmjet AKP-së dhe gjykatave, ri-uzurpimin ilegal të pronës, dhe mungesën e mekanizmave të kompensimit efektiv të pronarëve me të drejtë shfrytëzimi të pronës.
“Qëllimi i Agjencisë Kosovare të Pronës është që të jetë në gjendje, në mënyrën më të shpejtë të mundshme, të kthej pronën private, komerciale apo bujqësore, te pronari i vërtetë pa ndërhyrë sistemin konvencional gjyqësor”, tha Kryesuesi i Bordit Mbikëqyrës të AKP-së dhe Zëvendës Shefi i Misionit të Bashkimit Evropian për Sundim të Ligjit (EULEX), Andy Sparkes.
“Ne sigurisht që duhet t’i shmangemi çdo përplasjeje ndërmjet asaj që bënë AKP dhe sistemi gjyqësor konvencional”, shtoi ai.
Raporti ofron një varg rekomandimesh se si të adresohen të mangësitë e identifikuara përfshirë edhe përmirësimin e bashkëpunimit ndërmjet gjykatave dhe AKP-së, rritjen e njohurive të gjykatësve rreth juridiksionit të AKP-së dhe sigurimin se janë ngritur akuzat penale kundër personave që ri-uzurpojnë ilegalisht pronat.
Raporti gjithashtu u bën thirrje institucioneve të Kosovës që të ofrojnë mbështetje adekuate financiare dhe politike për AKP-në në mënyrë që ky organ të mund ta kryejë punën e vet.
Raporti i plotë mund të gjendet në faqen zyrtare të internetit: //www.osce.org/sq/kosovo/80436