OSBE dënon sulmin ndaj gazetarit në Kosovë
PRISHTINË / VJENË, 27 janar 2016 - Shefi i Misionit të OSBE-së në Kosovë, Ambasadori Jean-Claude Schlumberger, dhe Përfaqësuesja e OSBE-së për Lirinë e Medias, Dunja Mijatovic, shprehën sot shqetësimin e tyre lidhur me sulmin e djeshëm ndaj Gazmend Morinës, gazetar i portalit të lajmeve Veriu.Info me seli në Mitrovicë të Jugut.
“E dënoj fuqishëm këtë sulm. Gazetarët duhet të jenë në gjendje të punojnë lirshëm dhe në mënyrë të sigurtë, pavarësisht temës që përcjellin,” tha Schlumberger.
Morina u sulmua fizikisht nga dy persona, njëri ndër ta anëtar i Kuvendit Komunal, pas raporteve që kritikonin menaxhimin e kompleksit të minierave Trepça.
“Është detyrë e gazetarëve të hulumtojnë të gjitha temat e mundshme me interes për publikun, siç edhe është obligim i zyrtarëve publikë të jenë të përgjegjshëm,” tha Schlumberger.
Ai u bëri thirrje organeve për zbatim të ligjit dhe Komunës së Mitrovicës së Jugut të marrin masat e duhura.
“Sulmi ndaj një gazetari është sulm ndaj gjithë shoqërisë,” tha Mijatovic. “Siguria fizike është parakusht themelor në mënyrë që pjesëtarët e mediave të mund të bëjnë punën e tyre. Ky incident duhet të hetohet me shpejtësi dhe autorët të sillen para drejtësisë.”
Misioni i OSBE-së në Kosovë ka për mandat mbrojtjen dhe promovimin e të drejtave të njeriut, demokratizimin, si dhe zhvillimin e sektorit të sigurisë publike. Mision mbron lirinë e medias dhe lirinë e shprehjes, dhe mbështet zhvillimin e mediave.