ЕҚЫҰ Қазақстан Республикасы Ұлттық қауіпсіздік комитетінің Шекара қызметіне арналған ҰҰА оқу орталығын құру тұжырымдамалық құжатын ұсынды
2025 жылғы 29 қаңтарда ЕҚЫҰ-ның Астанадағы Бағдарламалар кеңсесі (Кеңсе) Қазақстан Республикасы Ұлттық қауіпсіздік комитетінің Шекара қызметіне арналған «Ұшқышсыз ұшу аппараттары (ҰҰА) оқу орталығын дамыту» тұжырымдамалық құжатын ұсынды. Бұл маңызды кезең Қазақстанның шекара қауіпсіздігін күшейтуге бағытталған жоба аясындағы үлкен қадам болып табылады. Жоба заманауи ҰҰА технологияларын қолдану арқылы Қазақстанның шекаралық қауіпсіздік мүмкіндіктерін кеңейтуді көздейді.
Тұжырымдамалық құжат Қазақстанның Леңгер қаласында ҰҰА оқу орталығын (Ленгер ҰҰА шеберлік орталығы) кезең-кезеңімен құру жоспарын сипаттайды. Бұл орталықтың құрылуы – шекаралық бақылау операцияларын жаңғырту мен Қазақстанның Шекара қызметінің тиімділігін арттыруға бағытталған басты бастамалардың бірі. Жоба бұған дейінгі техникалық бағалаулар мен ЕҚЫҰ-ның қолдауымен өткізілген әлеуетті арттыру іс-шараларының нәтижелеріне негізделген.
Тұжырымдамалық құжаттың әзірленуі және оның ұсынылуы жобаның маңызды кезеңін білдіреді. Бұл құжат арқылы ЕҚЫҰ ҰҰА оқу орталығының болашақ дамуына арналған кешенді жол картасын ұсынады. ЕҚЫҰ қолдауымен 2024 жылдың қыркүйегінде Леңгердегі ҰҰА шеберлік орталығының жұмысы басталды. Бұл бастама шекара қауіпсіздігі саласында оқыту және операциялық мүмкіндіктерді кеңейтуге жол ашады, оның ішінде ең жаңа технологияларды пайдалану және әртүрлі ҰҰА түрлерін түрлі операциялық сценарийлерде қолдану, соның ішінде биікке ұшу және түнгі операциялар жүргізу мүмкіндіктерін қамтиды.
«Тұжырымдамалық құжаттың ұсынылуы – Қазақстанның Шекара қызметімен әріптестігіміздің маңызды кезеңі. Бұл жоба ЕҚЫҰ-ның заманауи қауіпсіздік сын-қатерлеріне инновациялық шешімдер ұсынуға және оларды іске асыруға деген тұрақты міндеттемесін көрсетеді», – деді жоба жетекшісі, Кеңсе өкілі Ярослав Курек.
ЕҚЫҰ жоба ілгерілеген сайын консультативті қолдау көрсетуді жалғастырады, атап айтқанда, оқу материалдарын әзірлеуге және алғашқы ҰҰА оқу курсын іске қосуға назар аударады. Леңгердегі ҰҰА шеберлік орталығының құрылуы – ЕҚЫҰ мен Қазақстанның Шекара қызметі арасындағы табысты серіктестіктің жарқын мысалы, бұл бастама технологиялық бейімделуге және тұрақты оқыту жүйесін дамытуға ықпал етеді.