Ձերբակալվածներին պահելու վայրերում մարդու իրավունքները՝ ԵԱՀԿ աջակցությամբ իրականացվող աշխատաժողովի ուշադրության կենտրոնում
Ձերբակալվածներին պահելու վայրերում (ՁՊՎ) մարդու իրավունքների պաշտպանության խթանմանն ու ուժեղացմանն ուղղված երկօրյա աշխատաժողովը մեկնարկեց 2016 թ. ապրիլի 12-ին Դիլիջանում: Աշխատաժողովը կազմակերպվել է ԵԱՀԿ երևանյան գրասենյակի կողմից՝ ՀՀ ոստիկանության ձերբակալվածներին պահելու վայրերում վերահսկողություն իրականացնող հասարակական Դիտորդական խմբի հետ համագործակցությամբ:
Ոստիկանության շտաբի, Բժշկական վարչության և երկրի հյուսիսային մարզերի ոստիկանության ՁՊՎ-ների շուրջ քսան ոստիկանության սպաներ, ինչպես նաև քաղաքացիական հասարակությունը ներկայացնող հասարակական դիտորդների խումբը կդիտարկեն ոստիկանության ՁՊՎ-ներում մարդու իրավունքների պաշտպանության և սանիտարահիգիենիկ պայմանների հետ կապված հարցերը:
Աշխատաժողովի ուշադրության կենտրոնում կլինեն նաև ձերբակալված և կալանավորված անձանց նկատմամբ վերաբերմունքի օրենսդրական պահանջներն ու մարդու իրավունքների միջազգային պարտավորությունները, առաջին օգնության, բուժօգնության իրավունքները և ձերբակալված և կալանավորված անձանց այլ հիմնարար ու անձեռնմխելի իրավունքները:
«Մենք հավատացած ենք, որ ոստիկանության և քաղաքացիական հասարակության համատեղ ջանքերի շնորհիվ աշխատաժողովն արդյունավետ կլինի՝ լավագույն փորձին ծանոթանալու և Հայաստանում ոստիկանության բարեփոխումները խթանելու տեսանկյունից՝ մարդու իրավունքներն ունենալով որպես գործընթացի անկյունաքար»,-ասաց ԵԱՀԿ երևանյան գրասենյակի մարդու իրավունքների ծրագրի ղեկավար Ռադկա Ռուբիլինան:
ՀՀ ոստիկանության ձերբակալվածներին պահելու վայրերում վերահսկողություն իրականացնող հասարակական Դիտորդական խմբի նախագահ Հասմիկ Սահակյանը և ՀՀ ոստիկանության հերթապահ մասերի վարչության պետ, ոստիկանության գնդապետ Վահրամ Աբրահամյանը միջոցառմանը հանդես եկան ելույթներով:
Նմանատիպ աշխատաժողով կկազմակերպվի ապրիլի 21-ից 23-ը Ջերմուկում՝ Հայաստանի հարավային մարզերի ոստիկանության սպաների և հասարակական դիտորդների մեկ այլ խմբի համար: Նախաձեռնությունը գրասենյակի ՝ իրավական և քրեական արդարադատության բարեփոխումներին աջակցելու և քաղաքացիական հասարակության ներգրավման խթանման ջանքերի մաս է կազմում: