ԵԱՀԿ-ն համակազմակերպում է ֆոտոցուցահանդես՝ Հայաստանում Մամուլի ազատության համաշխարհային օրը նշանավորելու նպատակով
2013թ. մայիսի 3-ին Երևանում բացված ֆոտոցուցահանդեսի թեման է «Մամուլի ազատություն. տեղեկատվություն ստանալու իրավունք»:
Ցուցահանդեսում ներկայացված են լուսանկարներ և ծաղրանկարներ, որոնց դիտակետում Հայաստանում տեղեկատվության իրավունքի իրականացումն է: Միջոցառումը կազմակերպվել է «Հայաստանի ինֆորմացիայի ազատության կենտրոն» հասարակական կազմակերպության կողմից՝ ԵԱՀԿ Երևանի գրասենյակի, Եվրոպական միության Հայաստանի պատվիրակության և ԱՄՆ ՄԶԳ հայաստանյան գրասենյակի հետ համագործակցությամբ:
«Այսօր այստեղ ներկայացված լուսանկարներից և գեղարվեստական աշխատանքներից յուրաքանչյուրը Հայաստանում քաղաքացի լինելու մի յուրահատուկ դրսևորում է», - ասաց ԵԱՀԿ Երևանի գրասենյակի ժողովրդավարացման ծրագրի ղեկավար Օլիվեր Մակքոյը: «Դրանք անհատական ստեղծագործ մտքի և խոսքի ազատության իրական վկայություն են»:
«Մամուլի ազատության համաշխարհային օրվա առթիվ բացված այս ցուցահանդեսը հիշեցում է ազատ խոսքի և տեղեկատվության մատչելիության իրավունքի մասին, որոնք երկուսն էլ ԵԱՀԿ արժեքներ են», - ավելացրեց նա:
Ինֆորմացիայի ազատության կենտրոնի նախագահ Շուշան Դոյդոյանն ասաց. «Այս տարի թեմայի շուրջ ստացել ենք ավելի քան 500 լուսանկար և ծաղրանկար, ինչը ցույց է տալիս հասարակության հետաքրքրությունը այս թեմայի նկատմամբ: Լուսանկարիչները և նրանց նկարներում պատկերված մարդիկ իրենց բողոքն են բարձրացնում ընդդեմ մամուլի ազատության ոտնահարումների և բարձրաձայնում են տեղեկատվության մատչելիության իրենց իրավունքը՝ անկախ իրենց առջև ծառացած խոչընդոտների»:
Ցուցադրված աշխատանքների հավաքածուն նաև կտպագրվի ցուցահանդեսի կատալոգում:
Մամուլի ազատության համաշխարհային օրը ամեն տարի մայիսի 3-ին նշվում է ամբողջ աշխարհում՝ մամուլի ազատության հիմնարար սկզբունքները վերահաստատելու նպատակով: